රජයේ රෝහල් වල ආහාර පිළිගැන්වීමේ වෙනසක්: නියමු ව්යාපෘතිය මහරගම අපේක්ෂා රෝහලෙන් ඇරඹෙයි
Citizen News , කොළඹ (ජනවාරි 07) – මෙරට රජයේ රෝහල් පද්ධතිය තුළ රෝගීන් සඳහා ලබාදෙන ආහාර පාන වඩාත් ගුණාත්මක, පෝෂදායී සහ විධිමත් ලෙස ලබාදීමේ විශේෂ නියමු ව්යාපෘතියක් ඊයේ (06) දින මහරගම අපේක්ෂා රෝහල කේන්ද්ර කරගනිමින් ආරම්භ විය.
රජයේ “පොහොසත් රටක් - ලස්සන ජීවිතයක්” ප්රතිපත්ති ප්රකාශයට අනුව සෞඛ්ය ක්ෂේත්රයේ සිදුකිරීමට නියමිත ප්රතිසංස්කරණවල එක් පියවරක් ලෙස මෙම වැඩපිළිවෙළ ක්රියාවට නැංවේ.
මෙම නව ව්යාපෘතිය යටතේ රෝගී සත්කාරක සේවාවන්හි ප්රමිතිය ඉහළ නැංවීම සඳහා හඳුන්වා දී ඇති ප්රධාන වෙනස්කම් මෙසේය:
වෙන් කරන ලද ආහාර පිඟාන (Partitioned Plates): මීට පෙර පැවති සියලු ආහාර වර්ග එකට මිශ්ර කර පිළිගැන්වීමේ ක්රමය වෙනුවට, බත් සහ වෑංජන වෙන් වෙන් වශයෙන් පිරිසිදුව පිළිගැන්විය හැකි පරිදි සකස් කළ නව ආහාර පිඟාන් හඳුන්වා දී ඇත. මෙහි ප්රධාන අරමුණ වන්නේ රෝගියාගේ ආහාර රුචිය වර්ධනය කරමින් මානසික තෘප්තිය ඉහළ නැංවීමයි.
ආහාරපාන දෙපාර්තමේන්තුවක් ස්ථාපනය කිරීම: රෝහල් මුළුතැන්ගෙය යන්න නවීකරණය කරමින් ‘ආහාරපාන දෙපාර්තමේන්තුවක්’ (Catering Department) ලෙස පවත්වාගෙන යාම ආරම්භ කර ඇත. තරු පන්තියේ හෝටල් පුහුණුව ලැබූ කාර්ය මණ්ඩලයක් සහ වෘත්තීය මට්ටමේ ආහාර පිසින්නන් (Chefs) යොදා ගනිමින් ඉහළ සෞඛ්යාරක්ෂිත ප්රමිතියක් මෙහිදී සහතික කෙරේ.
දිනපතා වෙනස් වන මෙනු පත (Rotating Menu): රෝගීන්ගේ පෝෂණ අවශ්යතා සපුරාලන අතරම, දිනපතා වෙනස් වන විවිධත්වයකින් යුත් ආහාර වේලක් ලබාදීමට කටයුතු යොදා ඇත.
රෝහල් පරිසරය තුළ රෝගියෙකුගේ සුව වීම කෙරෙහි පෝෂණය මෙන්ම මානසික තත්ත්වයද දැඩිව බලපාන බව සෞඛ්ය අංශ පෙන්වා දෙයි. මෙම නව ක්රමවේදය හරහා රෝගියාට ගරුත්වයක් සහිත සේවාවක් ලබාදීම මගින් ඔවුන්ගේ සුව වීමේ ක්රියාවලිය කඩිනම් කිරීම රජයේ අපේක්ෂාවයි.
මෙම නියමු ව්යාපෘතියේ සාර්ථකත්වය අධ්යයනය කිරීමෙන් අනතුරුව, ඉදිරියේදී දිවයිනේ සියලුම ප්රධාන රෝහල් කරා මෙම වැඩපිළිවෙළ ව්යාප්ත කිරීමට සෞඛ්ය අමාත්යාංශය සැලසුම් කර ඇත.
