සහරාන්ගේ තවත් පුහුණු තිප්පොළක් අරුප්පලින් සොයාගනියි.

0
2242

ජාතික තවුහීත් ජමාත් සංවිධානයේ ප්‍රබල සාමාජිකයින් පුහුණු කඳවුරක් ලෙස භාවිත කළ බව කියන මහනුවර, අරුප්පල ප්‍රදේශයේ දෙමහල් නිවසක් ආරක්ෂක අංශ විසින් ඊයේ (16) සොයාගෙන තිබෙනවා.

යුද, ගුවන්, නාවික සහ පොලිස් බලඇණි දින ගණනාවක් පුරා සිදුකළ සෝදිසි මෙහෙයුමකදී මෙම සුවිසල් දෙමහල් නිවස පිළිබඳ තොරතුරු අනාවරණය කරගෙන තිබිණි යැයි ආරක්ෂක අංශ පවසනවා.

මහනුවර, අරුප්පල, ධර්මාශෝක මාවතේ පිහිටි මෙම දෙමහල් නිවස සුවිසල් තාප්පයකින් වටවී තිබූ අතර නිවාස භූමියෙහි විශාල ප්‍රමාණයේ ගරාජයක්ද තිබුණා.

සැකකටයුතු නිවෙස සෝදිසිකිරීමේදී අන්තවාදීන් විසින් භාවිත කරනු ලැබූ බවට සැකකෙරෙන පොත්පත් රාශියක් සහ දේශන පැවැත්වීමේදී පාවිච්චි කරනු ලැබූ ආම්පන්න කිහිපයක්ද සොයාගෙන ඇතැයි සඳහන් වනවා.

මෙම දෙමහල් නිවසේ ව්‍යාපාරිකයකු විසින් නවාතැන්පොළක් පවත්වාගෙන ගොස් ඇති අතර එම ස්ථානයට පැමිණෙන පුද්ගලයින් පිළිබඳ සටහන් තබන තොරතුරු පොතට අනුව මෙම ත්‍රස්තවාදී කණ්ඩායම් වරින්වර මෙම නිවසට පැමිණ ඇති බවට තොරතුරු අනාවරණ වන බවත් ආරක්ෂක අංශ පවසනවා.

ත්‍රස්තවාදී කණ්ඩායමේ සාමාජිකයින් වරකට අටදෙනෙකු පමණ මෙම ස්ථානයේ ලැගුම් ගෙන ඇති බවද ඔවුන් දේශන පවත්වමින් ඉතා රහසිගතව මෙම නිවසේ සති දෙකක පමණ කාලයක් රැඳී සිට ඇති බව අනාවරණය වී ඇතැයිද ආරක්ෂක අංශ වැඩිදුරටත් සඳහන් කරනවා.

ත්‍රස්ත කණ්ඩායම් මෙම නිවසේ රැඳී සිටියදී ඔවුන් මුණගැසීම සඳහා බාහිර පුද්ගලයන් කීපදෙනෙකු සුඛෝපභෝගී වාහනවලින් වරින්වර පැමිණ ඇති බව එම නිවසේ සේවකයන්ගෙන් කරන ලද ප්‍රශ්නකිරීම්වලින් අනාවරණය වී තිබෙනවා.

ආරක්ෂක අංශ මහනුවර නගරයේ සිදුකළ ඒකාබද්ධ විශේෂ සෝදිසි මෙහෙයුමකදී අන්තවාදී කණ්ඩායම්වලට අයත් බවට සැකපිට අත්අඩංගුවට ගන්නා ලද සැකකරුවන්ගෙන් කළ ප්‍රශ්න කිරීම්වලදී මෙම දෙමහල් නිවසේ පවත්වාගෙන ගිය බව කියන පුහුණු කඳවුර පිළිබඳ තොරතුරු අනාවරණය කරගත් බව ආරක්ෂක අංශ පැවසුවා.

තවුහීත් ජමාත් සංවිධානයේ ප්‍රබල සාමාජිකයන් 2018 වසරේ සිට මෙම ස්ථානය සිය දේශන පැවැත්වීමේ පුහුණු කඳවුරක් ලෙස පවත්වාගෙන ගොස් ඇති බවත් එම සංවිධානයේ නායකයා ඇතුළු නායකයින් රැසක් මෙහි පැමිණ සිට ඇති බවත් ප්‍රශ්න කිරීම්වලදී අනාවරණය වී ඇතැයිද ආරක්ෂක අංශ සඳහන් කරනවා.

ආරක්ෂක අංශ විසින් සිදුකරන ලද සෝදිසි මෙහෙයුම්වලදී මහනුවර ප්‍රදේශයෙන් අත්අඩංගුවට ගත් සැකකරුවන් සිවු දෙනකු මේ වන විට මහනුවර පොලිසියේ රඳවා තබාගෙන ප්‍රශ්න කරගෙන යන බව පොලිසිය පැවසුවා.

LEAVE A REPLY

Please enter your comment!
Please enter your name here