වෛද්‍ය සංගමයේ ලේකම්ගෙන්, රාජිත බිලියනයක වන්දියක් ඉල්ලයි.

රජයේ වෛද්‍ය නිලධාරී සංගමයේ ප්‍රකාශ හේතුවෙන් සමාජයට වැරදි මත ඉදිරිපත්වීම නිසා තම කීර්ති නාමයට සිදු වූ හානියට රුපියල් බිලියනයක මුදලක් ගෙවන ලෙස සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ මහතා වෙත එන්තරවාසියක් යොමු කර තිබෙනවා.

ඒ, සින්නදොරේ සුන්දරලිංගම් සහ බාලේන්ද්‍ර නීතිඥ සමාගම මගින්.

2019 ජුනි මස 24 දින මෙම එන්තරවාසිය යොමු කර ඇති අතර සති 03 ක් තුල අදාල මුදල නොගෙවන්නේ නම් වැඩිදුර නීතිමය ක්‍රියාමාර්ග ගැනීමට ද නියමිත බව එම එන්තරවාසියේ සඳහන්.

2019 ජුනි 17 දින හෝ ඊට ආසන්න දිනයක දී රජයේ වෛද්‍ය නිලධාරින්ගේ සංගමය පුළුල් මාධ්‍ය ආවරණයක් සහිතව මාධ්‍යහමුවක් පවත්වා සිදු කළ ඇතැම් ප්‍රකාශ හේතුවෙන් තම කීර්තිනාමයට හානියක් සිදු වූ බව සෞඛ්‍ය අමාත්‍ය රාජිත සේනාරත්න මහතා එන්තරවාසියෙන් දැනුම් දී තිබෙනවා.

වැරදි තොරතුරු ඉදිරිපත් කරමින් ඖෂධ ආනයනය කිරීමේ දී රුපියල් බිලියන 20 ක මුදලක් රජයට අහිමි කළ බව ප්‍රකාශ කිරීම, ගුණාත්මකභාවයෙන් තොර ඖෂධ ආනයනය කිරිම, ශ්‍රී ලාංකිකයින්ට එරෙහි වැඩපිළිවෙළක් ක්‍රියාත්මක කිරීම, සුවපති කිරුළ සදහා රජයේ මුදල් අවභාවිතා කිරීම වැනි වටිනාකමකින් තොර වගකීම් රහිත ද්වේෂ සහගත අසත්‍ය ප්‍රකාශ එම මාධ්‍ය හමුවේ දී ඉදිරිපත් කර ඇති බව එන්තරවාසියේ දැක්වෙනවා.

එම ප්‍රකාශ මාධ්‍යයේ පළවීම හේතුවෙන් තමන් කම්පාවට පත් වූ බවත්, තම කීර්තිනාමයට හානියක් සිදු වී ඇති බවත් සෞඛ්‍ය අමාත්‍යවරයා එන්තරවාසියෙන් පෙන්වා දෙනවා.

ජාතික මැතිවරණ ඉදිරියේ දී පැවැත්වීමට නියමිත වකවානුවක සෞඛ්‍ය අමාත්‍යවරයාගේ චරිතයට හානි කිරීමේ ප්‍රචාරක වැඩපිළිවෙළක් රජයේ වෛද්‍ය නිලධාරින්ගේ සංගමය දියත් කර ඇති බව එන්තරවාසියේ සඳහන්. මැතිවරණ වලදී සෞඛ්‍ය අමාත්‍යවරයා ප්‍රබල කථිකයෙකු ද වෙනවා.

තහවුරු කරන ලද , විශ්වසනීය 💯 සියලු උණුසුම් පුවත් 📰 නොමිලේම 🆓 එසැනින් ඔබේ දුරකථනයට ලබා ගැනීමට මෙම Link එක Click කරන්න