කුණු කන්දට සිදු වූ දේ රටට වීමට ඉඩ දෙන් නෑ  – අගමැති කියයි

0
54

අග්‍රාමාත්‍ය රනිල් වික්‍රමසිංහ මහතා මෙම අදහස් පළ කළේ දෙමටගොඩ අභිනවයෙන් ඉදි කරන ලද සියපත් සෙවණ නිවාස ව්‍යාපෘතියේ නිවාස 266ක් ජනතා අයිතියට පැවරීම නිමිත්තෙන් එම නිවාස සංකීර්ණයේ පැවති උත්සවයේදීය.

රුපියල් මිලියන 1064ක වැය කරමින් දෙමටගොඩ සියපත් සෙවණ මහල් නිවාස ව්‍යාපෘතිය ඉදිකළ අතර එම උත්සවයේදී තව දුරටත් අදහස් දැක්වූ රනිල් වික්‍රමසිංහ මහතා මෙසේද පැවසීය.

සියපත් සෙවණ නිවාස යෝජනා ක්‍රමය යටතේ නිවාස 266 ක් ජනතා අයිතියට පත්කිරීමට අද අපට අවස්ථාව ලැබුණා. මේ නිවාස මෙලෙස ඔබට ලබාදීමට හැකි වුණේ චම්පික රණවක ඇමතිතුමාගේ උත්සාහය හා කැපවීම නිසයි.

චම්පික රණවක ඇමතිතුමා ප්‍රකාශ කළ පරිදි 2022 – 23 පමණ වනවිට දෙමටගොඩ ප්‍රදේශයේ තවත් නිවාස 22000 ඉදිකිරීමට සැලසුම් කර තිබෙනවා. මේ නිවාස සියල්ල අප ලබා දෙන්නේ අඩු ආදායම්ලාභීන් සඳහා බව කිව යුතුයි. මෙම නිවාස ව්‍යාපෘතියට නිවාස 40,000 පමණ අයත් වෙනවා. මෙය ඉදිකර වැඩ අවසන් කිරීම ලෙහෙසි පහසු කාර්යයක් නොවෙයි.

දෙමටගොඩ මෙම නිවාස ඉදිකිරීම සඳහා සම්පූර්ණයෙන්ම භාණ්ඩාගාරයෙන් මුදල් දුන්නේ නැහැ. භාණ්ඩාගාරයෙන් මුදල් වෙන් නොකර තිබියදීත් මෙම නිවාස ඉදිකිරීමට චම්පික රණවක ඇමතිතුමා කටයුතු කළා. එපමණක් නොවෙයි අඩු ආදායම්ලාභීන්ට ඔවුන් ජීවත් වූ පැල්පත් නිවාස වලින් මෙම නව නිවාස වලට ගෙන්වා ගැනීමට ද එතුමා දැඩි උත්සාහයක් ගෙන කටයුතු කර තිබෙනවා.

මෙම අවස්ථාවට මහ නගර හා බස්නාහිර සංවර්ධන අමාත්‍ය පාඨලි චම්පික රණවක, පාර්ලිමේන්තු මන්ත්‍රිවරුන් වන මුජිබර් රහුමාන්, කොළඹනගරාධිපතිනි රෝසි සේනානායක යන මහත්ම මහත්මීන් ඇතුළු දෙශපාලඥයින්, අමාත්‍යාංශයේ නිලධාරීන්, හා ප්‍රදේශවාසීන් රැසක් සහභාගි වී සිටියහ.

LEAVE A REPLY

Please enter your comment!
Please enter your name here