ඉවත් කරපු ආකාරය ගැන තරමකත් ප්‍රශ්න ජනකයි – හතුරුසිංහ කියයි

ජාත්‍යන්තර ක්‍රිකට් කවුන්සිලය විසින් ශ්‍රී ලංකාවේ සිදුවූ බව කියන තරග පාවාදිම් පිළිබඳව කරන පරික්ෂණ ශ්‍රී ලංකා ක්‍රිකට් කණ්ඩායමට බලපෑමක් එල්ල කළ බව ශ්‍රී ලංකා ක්‍රිකට් පුහුණුකරු චන්දික හතුරුසිංහ පවසයි.ක්‍රික්ඉන්ෆෝ පුවත් සේවය හා සම්මුඛ සාකච්ඡාවකට එක්වෙමින් ඔහු මේ බව සඳහන් කළේය.

“ අපි හැමදෙනාම මිනිස්සු. අයි.සී.සී. පරීක්ෂණවලින් බලපෑමක් තිබුණා. නොවැම්බර් අවසානයේදී තේරීම් කමිටුව වෙනස්වුණා. තේරීම් කමිටුව මාරුවිමත් සමග නායකයන් වෙනස්වුණා. ඒ වගේම පුහුණු මණ්ඩලයේ වෙනසක් වුණා. ඒය අස්ථාවරත්වයක් නිර්මාණය කළා.

හැම දෙයක්ම වුණේ ප්‍රසිද්ධියේ. ඉතින් ක්‍රිඩකයන්ට මොකද වුණේ. ඔවුන්ට පීඩනයක් තිබුණා. ක්‍රීඩකයන්ට හැරෙන්න තැනක් තිබුණේ නෑ. ඔවුන් දන්නේ නෑ කවුද විශ්වාස කරන්නේ කාගේ උපදෙස්ද පිළිපදින්නේ කියලා. මේ වගේ පරිසරයක තමන් ගැන සිතිම මිනිස් ස්වාභාවයයි.”

තරග සංචාරයකදී තේරීමේ කටයුතු වලින් තමාව ඉවත් කිරීමට ගත් තීරණය පිළිබඳවද හතුරුසිංහ මෙහිදී අදහස් දැක්වීය.

“ ඒක මට පාලනය කරන්න බෑ. ඒ සඳහා හේතුවක් තිබිය යුතුයි. ඒක ඉවත් කරපු ආකාරය ගැන තරමකත් ප්‍රශ්න ජනකයි. ඒක වුණේ තරගාවලියක් අතර මැදදීයි. ඒය සිදුවුණ ආකාරය ගැන මගේ කනගාටුවක් තිබෙනවා. ඒක තමයි මට තිබෙන ප්‍රශ්ණය මේ දක්වාම මට පිළිතුරක් නෑ. ”