Citizen.lk
 

පොහොට්ටුවට බහුතරය එරෙහියි - රාජිත

 පොහොට්ටුවට බහුතරය එරෙහියි - රාජිත | Rajitha Senarathne Speaks
Tue 13 February 2018 12:25 pm
472 views

ලංකාවේ බහුතර ඡන්ද දායකයන් සිය ඡන්දය භාවිත කර තිබෙන්නේ පොහොට්ටුව ලකුණෙන් තරග කළ ශ්‍රී ලංකා පොදු ජන පෙරමුණට එරෙහිව බවත් එයට ලැබී ඇත්තේ පසුගිය ජනාධිපතිවරණයේදී මහින්ද රාජපක්‍ෂ මහතාට ලැබුණු ඡන්ද ප‍්‍රමාණයට වඩා අඩු ඡන්ද ප‍්‍රතිශතයක් බවත් සෞඛ්‍ය පෝෂණ හා දේශීය වෛද්‍ය අමාත්‍ය රාජිත සේනාරත්න මහතා පවසයි.


යහපාලන ආණ්ඩුවට 2015 ජනවාරි 08 වැනිදා පැවති ජනපතිවරණයේ දී ලැබුණු ජනවරම පළාත් පාලන මැතිවරණයේදී තවත් ශක්තිමත් වී ඇති බැවින් අගමැතිවරයා වෙනස් කිරීමේ හෝ ආණ්ඩුව ඉල්ලා අස්වීමේ කිසිදු අවශ්‍යතාවක් මතු වී නොමැති බව ද රාජිත සේනාරත්න මහතා සඳහන් කරයි.

ප‍්‍රකාශිත ඡන්ද ප‍්‍රතිඵලවලට අනුව ශ‍්‍රී ලංකා පොදු ජන පෙරමුණට ලැබී තිබෙන්නේ ප‍්‍රකාශිත ඡන්ද සංඛ්‍යාවෙන් සියයට 45 කට ආසන්න ඡන්ද ප‍්‍රතිශතයක් බව පවසන අමාත්‍යවරයා එය ජනවාරි 08 මැතිවරණයේ දී හිටපු ජනාධිපතිවරයා ලබා ගත් ඡන්ද ප‍්‍රතිශතයට වඩා අඩු ඡන්ද ප‍්‍රතිශතයක් බව කියා සිටී.

අමාත්‍යවරයාගේ මාධ්‍ය අංශය විසින් අමාත්‍යවරයාගේ අදහස් සහිතව නිකුත් කර ඇති මාධ්‍ය නිවේදනයෙහි මේ බව සඳහන් වේ.

තමන් ඩලස් අලහප්පෙරුම මහතා මෙන් ඇමෙරිකාවට පලා ගියේ නැතැයි පවසන අමාත්‍යවරයා ජනවරමට අනුව අපේක්ෂාවන් ඉටු කිරීමේ සටනේ තවදුරටත් රැදී සිටිමින් 2020 න් පසු ජනාධිපතිවරයා යළි පත් කිරීමට ද කටයුතු කරන බව අමාත්‍යවරයා එහි සඳහන් කර තිබේ.
අමාත්‍ය රාජිත සේනාරත්න මහතා මෙසේ ද ප‍්‍රකාශ කර ඇත.

‘‘ප‍්‍රතිඵලය පිළිබඳව මා ජනාධිපති මෛත‍්‍රීපාල සිරිසේන සහ අගමැති රනිල් වික‍්‍රමසිංහ මහත්වරුන් සමග සාකච්ඡා කළා. ආණ්ඩුවේ අඩු පාඩු නිවැරදි කරගෙන ඉදිරියට යාමට ඔවුන් දෙදෙනාම කැමැත්ත පළ කළා. පළාත් පාලන මැතිවරණය ජයගෙන අග‍්‍රාමාත්‍යවරයා වීමට හෝ මහ මැතිවරණයක් පැවැත්වීමට හිටපු ජනාධිපතිවරයා සිහිනයක සිටිය ද එය ඉටු වන්නේ නැහැ.

හිටපු ජනාධිපතිවරයාට අග‍්‍රාමාත්‍ය ධූරය ලබාදීමට ශ‍්‍රී ලංකා නිදහස් පක්ෂය හෝ එක්සත් ජාතික පක්ෂය මෙතෙක් යෝජනා කර නැහැ. 2015 වසරේ වත්මන් රජයට ජනවරම ලබාදී ඇත්තේ දුෂණය සහ වංචාව පිටුදැකීමටයි. එය අඛණ්ඩව ඉදිරියට සිදු කිරීමට යහපාලන රජයේ නායකයින් එකගත්වයට පැමිණ තිබෙනවා.‘‘

Latest News

You may also like

Latest Videos

( 10 views)

Hot Video

Lasith Malinga Speech Before Asia Cup Trophy  | ගල් උඩත් ගස් පැලවෙනවා, හැබැයි ටිකක් කල් යනවා - මාලිංග

Citizen of the Week

Citizen.lk - Citizen Of The Week With Popular Writer Saman Edirimunee | සිඳු, දෙවන ඉණිම නාටකයන් ඔබේ හදවතට සමීප කළ තිරය පිටුපස සැඟවුණු මැවුම්කරුවා - සමන් එදිරිමුණිගේ කතාව - Exclusive Video

Popular News